《細細個嗰一刻》－《巴士叔叔》

《巴士叔叔》 作者：兄弟（若曦） 我記得呢！我讀小學嗰陣就仲有「熱九」嘅。等車嘅時候，最刺激就係伸長條頸望下嗰朝「抽」中「熱九」定「凍九」。 接送我過海返學嘅巴士係680，路程話長唔長，話短唔短，一上車坐係司機位旁邊排座座位度，除左沿途風景，就係望住司機個側面。我最記得，有個司機叔叔個樣有啲似馬騮，眼神兇兇地，我第一次見佢嘅時候，係有啲驚嘅。後來發現，返五日學有四日係佢載，望多兩望唔只順眼左，佢仲會同我打招呼㖭！跟住嘅日子，我等車嘅時候就唔再係伸個頭去望「熱九」定「凍九」，而係望下係咪呢個司機叔叔載我。如果係，唔知點解就會開心啲。 有一日，我親手畫左張HelloKitty核突信紙，寫左封信卑佢。內容類似係多謝佢一直載我返學咁話。當我一上車，錢都未入就遞封信卑佢個刻，我記得我地兩個都好開心。 之後佢點解冇再揸個條線？幾時開始冇再見到佢？回憶就好似《潛行空間》話事解，幾時開始發夢，同幾時醒，你都已經唔會記得......總之我地都依稀有印象，我地有發過夢，有過回憶。