《細細個嗰一刻》-《糖蔥餅》

《糖蔥餅》

節錄於《細細個嗰一刻》（第三屆香港青年作家比賽獲選作品）15個微縮模型 x 童年故事本地青年作家若曦，運用無限創意，創作各款演繹真摰本土情懷的微縮模型：糖蔥餅、大排檔奶茶、牛腩麵、魚蛋……分享點點滴滴的童年回憶，為讀者帶來會心微笑的共鳴。

屋企樓下，有一間士多鋪，除左煙之外，基本都係賣細路仔鐘意食嘅零食。每次行過，我都叫阿媽買，但媽唔買，佢話：「個叔叔頭先撩完鼻屎冇洗手呀！你睇唔到咩？」 之後，我放學行過，都專登望下佢到底有冇撩鼻屎！結果.......係冇嘅！ 「唔該一塊吖！」其實細個只知呢塊餅甜甜地脆脆地，塊皮又煙煙靭靭，除左想食之外，都冇認真理過佢叫咩名。 叔叔收左我五蚊雞之後，就帶手套，慢慢將一片片疊埋一齊嘅餅皮撕開，只用剔透的一片將大概一、二，三.......八，八個黐埋一齊嘅圈圈好快手咁卷起，套上雞皮紙袋，凸出上高半件，再將下底嘅空位卷起，方便我拎住食。 其實我之後都有好幾次見到佢有撩鼻屎，但件餅就同我嘅童年一樣，好嘅同唔好嘅，都已經食左落肚，既然都長大左，得閒咪記下細個五蚊雞就買到啖甜嗰種快樂囉！

《細細個嗰一刻》創作目的：

利用十兄弟（十隻手指）將自己細細個嗰陣會心一笑嘅一刻，分享給大家！ 寄語全港所有學童： 童年未必樣樣嘢都咁開心，但努力地成長吖！將來得閒回頭一望，總有幾刻你會發現細細個嗰陣，其實幾過癮。 寄語全港所有大人： 隻「大人手」係細路仔嘅觀點感受裡頭，係真係好大好大㗎！