《細細個嗰一刻》－《吱吱冰》

《吱吱冰》

節錄於《細細個嗰一刻》（第三屆香港青年作家比賽獲選作品）

15個微縮模型 x 童年故事本地青年作家若曦，運用無限創意，創作各款演繹真摰本土情懷的微縮模型：糖蔥餅、大排檔奶茶、牛腩麵、魚蛋……分享點點滴滴的童年回憶，為讀者帶來會心微笑的共鳴。

「黎若曦！」 我一轉身，就見到肥仔John雙手拎住吱吱冰衝埋嚟。吱吱冰當時已經俾佢擘開左，右手半支，左手半支。 「嗱！請你食吖！」John成日都會分半支卑我。 大概小學四年班度，我每日都搭校車返屋企,一落車好多時都撞到John。佢住我隔離嗰橦樓，返學讀同班，不過佢唔洗搭校車，好似係自行放學嘅。好多時撞到佢，都會一齊走去文具鋪呀，士多鋪呀之類，買啲野食下玩下，先捨得返屋企。總之，成件事我最記得就係當年唔洗錢，就有得分半支藥水咁嘅味嘅吱吱冰。 玩伴嘅野，原來同吱吱冰一樣。吖！衰得佢溶得鬼咁快！其實John係六年班下學期都再三同我講過，佢就快要去唔知英國定美國讀書，但我嗰陣意識唔到原來「我飛去外國讀書」 ， 即係講「再見」，所以冇上過心。一直到學期尾，佢真係走左。於是，我打去佢屋企想話問下，睇有冇得寫底佢個新地址咁。嗱！作為細蚊仔，覺得問人屋企人拎地址只係一件好單純嘅事，而我最後得到嘅回應當然係：「小朋友你邊位搵佢呀........」佢家姐實際講左咩我唔記得，總之我就從此冇再收到關於肥仔John嘅消息。 其實係我成長過程裡面，放係我手掌心搞到溶晒嘅「吱吱冰」又何只呢支呢？溶到你依加見班細路都唔食啦！士多唔入貨啦！咁又走嚟懷念囉！係囉！係咁㗎啦！ 對唔住！肥仔John!我真係唔記得你中文名，甚至連你個樣我都唔太有印象，我就係記得你分卑我個半支吱吱冰。如果你見到呢段野，而咁岩又記得我呢個食左你半支吱吱冰嘅同學女嘅話，就留個訊息過我，等我知你大過左啲英文有冇咯咯聲吖！ 願天下細路都記得會分半支吱吱冰卑你食嘅玩伴。